ಬದುಕು

ಅಪ್ಪನ ಸೈಕಲ್ಲಿನ ಸೀಟನ್ನು ಬಿಗಿಯಾಗಿ ಹಿಡಿದ ಕೈಗಳಿಗೆ ಅದೇನು ಬೇಕಿರಬಹುದು..

ಬಣ್ಣ ಬಣ್ಣದ ಬಲೂನು..?

ಊಹುಂ..

ವಿವಿಧಾಕಾರದ ತರಹೇವಾರಿ ಬಣ್ಣದ ಪುಗ್ಗಿಗಳೆಲ್ಲ ತನ್ನ ಹಿಂದೆಯೇ ಬರುತ್ತಿವೆ.. ತನ್ನವಲ್ಲದಿದ್ದರೂ!!

ಪುಟ್ಟ ಕಂಗಳಲ್ಲಿ ತುಂಬಿರುವುದು ಹಸಿವು, ಆಸೆಯಲ್ಲ! 

ಅಪ್ಪ ಕೊಡಿಸುವ ಐಸ್ ಕ್ಯಾಂಡಿಗಿಂತ ಇನ್ನಾವುದು ಮನಕೆ ತಂಪನೆರೆದೀತು?!!

(ಮಹಾನಗರಿಯ ಮನಸುಗಳು)

-ಚಿತ್ರ & ಸಾಲು 

ಪಲ್ಲವಿ

ಕರಗುವೆ...

ಕರಗುವೆ ನಾ ನಿನ್ನೊಲವ ಗೂಡಲ್ಲಿ

ಬೆರೆಯುವೆ ನಿನ್ನುಸಿರ ಶಾಖದಲಿ...

ಸದಾ ನಿನಗಂಟಿರುವೆ..

ನಟ್ಟಿರುಳಿನಲೂ, ನಡು ಹಗಲಿನಲೂ..

ಬರಲಾರೆಯ ಬೆಳಕಾಗಲು.....

ಚಿತ್ರ - ಸಾಲು :

ಪಲ್ಲವಿ

ಶಿವ ಶಕ್ತಿ

ಸಖ,

ನಾ ನಿನ್ನ ಸಖಿಯಾಗುವೆ..

ನೀ ಹಸಿರಾಗು, ನಾ ಉಸಿರಾಗುವೆ..

ನೀ ಬೆಳಕಾಗು, ನಾ ಹೊಳಪಾಗುವೆ..

ನೀ ಹೆಜ್ಜೆಯಾಗು, ನಾ ಲಯವಾಗುವೆ..

ನೀ ಶಿವನೇ ಆಗು.....

ಸಖ, ನಾ ನಿನ್ನ ಶಕ್ತಿಯಾಗುವೆ...

-ಪಲ್ಲವಿ

ನಿನ್ನೊಲವು

ನೀನೆಂದೂ ಮುಗಿಯದ ಕವನ

ಆದಿ ನಿನ್ನಿಂದಲೇ..

ಅಸ್ತಿತ್ವವೂ ನಿನ್ನಲ್ಲೇ...

ಸಖ,

ನಿನ್ನ ಕಣ್ಣ್ಬಟ್ಟಲಲಿ ಕಾಣುವ

ಬಿಂಬವೇ ಸಾಕ್ಷಿ ಎನ್ನೊಲವಿಗೆ..

ನಿನ್ನೊಲವ ಮಳೆಯಲಿ ಕರಗಿ

ಮತ್ತೆ ಚಿಗುರಿ ಅರಳಿ ಘಮಿಸುವ

ಹೊಸದೊಂದು ಆಸೆ ಗರಿಗೆದರಿದೆ...

ಹಾ..

ಮುಗಿಯದೀ ಕವನ...

ನಿನ್ನಂತೆ, ನಿನ್ನೊಲವಂತೆ....

-ಪಲ್ಲವಿ 

ಚಂದಿರ

ಇರುಳನೆಲ್ಲ ಬೆಳಕಾಗಿಸಿ 

ಧಗೆಯ ತಣಿಸಿ, ತಂಪನುಣಿಸಿ

ಮೌನವನೂ ಮಾತನಾಡಿಸಿ

ಉಸಿರಿಗಿಷ್ಟು ಘಮವ ಬೆರೆಸಿ

ಪಯಣದಲಿ ಜೊತೆಯಾದ-ನಲ್ಲ..

ಹತ್ತಿ ಮುದ್ದೆಗಳ ನಡುವೆ ಇಣುಕಿದ ಕಳ್ಳ!!

-ಪಲ್ಲವಿ

 ಇರುಳ ಮಡಿಲಿಗೆ ಸೇರುವ ತವಕ ಸೂರ್ಯನಿಗೆ, ಓಡುತ್ತಾನೆ ಒಂದರೆ ಘಳಿಗೆ ಕಾಯದೆಯೇ..

ನಮ್ಮ ನಿಮ್ಮಂತೆ ಟ್ರಾಫಿಕ್ ಸಿಗ್ನಲ್ ಇರುವುದೇ ಅವನಿಗೆ!!

 ಕತ್ತಲ ನಡುವೆ ಬೀದಿ ದೀಪವೊಂದು ಮರಗಳಿಗೆ ಭಾಷಣ ಮಾಡುತ್ತಿತ್ತು, ಈ ಬೀದಿಗೆ ನಾನೇ ಸೂರ್ಯ ಎಂದು..

ನಾಳೆ ಸೂರ್ಯ ಬರುವವರೆಗೂ ಎಲ್ಲರೂ ಅದರ ಮಾತನ್ನೇ ಕೇಳಬಹುದೇನೋ..