ಅಂದು ಮನದಲ್ಲೊಂದು ಆತಂಕ, ಸಣ್ಣ ಖುಷಿ, ಹಾಸ್ಟೆಲ್ ಜೀವನ ಹೇಗಿರಬಹುದೆಂಬ ಕುತೂಹಲ..! ರೂಮ್-ಮೇಟ್,ವಾರ್ಡನ್ ಎಲ್ಲ ಹೇಗಿರಬಹುದು ಎಂಬ ಪ್ರಶ್ನೆಗಳಿಗೆ ಎರಡೇ ದಿನದಲ್ಲಿ ಉತ್ತರ ದೊರೆತಿತ್ತು .
ಅಲ್ಲೊಂದು ಬಾಂಧವ್ಯ ರೂಪುಗೊಂಡಿತು. ಒಡಹುಟ್ಟಿದವರಲ್ಲದಿದ್ದರೂ ಅಕ್ಕ-ತಂಗಿಯರಾಗಿ ಅಪರೂಪದ, ಅನಿರೀಕ್ಷಿತ ಸಂಬಂಧಗಳು ಬೆಸೆದವು.
"ಎರಡು ಜಡೆಗಳು ಒಂದೆಡೆ ಸೇರಲಾರವು" ಎಂಬ ಮಾತಿದೆ.ಆದರೆ ಅಲ್ಲಿ ಸುಮಾರು ಹದಿನೈದು ಜಡೆಗಳು ಒಟ್ಟಾಗಿರುತ್ತಿದ್ದವು..! ಅವುಗಳಿಗೆ ಜಾತಿಭೇದವಿರಲಿಲ್ಲ,ಭಾಷಾಭೇದವಿರಲಿಲ್ಲ,ಧರ್ಮಭೇದವೂ ಇರಲಿಲ್ಲ.
ಕಾಲೇಜಿನಲ್ಲಿಯೂ 'ಹಾಸ್ಟೆಲ್ ಗ್ಯಾಂಗ್' ಎಂದೇ ಪ್ರಖ್ಯಾತಿಯಾದ ದಿನಗಳು! ತಡರಾತ್ರಿಯ ತರಲೆ, ಹರಟೆ ,ಗಾಸಿಪ್-ಗಳು!ಶಾಪಿಂಗ್ ಎಂದು ಹೋಗಿ ಅಂಗಡಿಯವನ ಜೊತೆ ಜಗಳವಾಡಿ ಖಾಲಿ ಕೈಲಿ ಬರುತ್ತಿದ್ದ ಕ್ಷಣಗಳು!
ಯಾರ ಮನೆಯಿಂದ ತಿಂಡಿ ಬಂದರೂ ಹದಿನೈದು ಮಕ್ಕಳಿಗೆ ಬರುತ್ತಿತ್ತು.. ಒಂದೇ ತಟ್ಟೆಯಲ್ಲಿ ಎಲ್ಲರೂ ಊಟಮಾಡಿದ ಕ್ಷಣಗಳು. ವರ್ಷವಿಡೀ ಬರ್ತ್-ಡೇ ಆಚರಣೆಗಳು! ಎಲ್ಲೋ ಸಣ್ಣ ಮನಸ್ತಾಪವಿದ್ದರೂ ಎಲ್ಲ ಸೇರಿ ಸರಿಪಡಿಸಲು ಬಳಸುತ್ತಿದ್ದ ಉಪಾಯಗಳು...
ಒಬ್ಬಳ ಅರೋಗ್ಯ ಹದಗೆಟ್ಟರೂ ಆರೈಕೆ ಮಾಡುವ ಮನಗಳು... ಒಬ್ಬಳ ಕಣ್ಣೀರಿಗೆ ಸಮಾಧಾನಪಡಿಸುವ ಹದಿನೈದು ಕೈಗಳು...ಪ್ರೀತಿಗೆ ಕೊನೆಯಿರಲಿಲ್ಲ...
ಪರೀಕ್ಷೆಯ ದಿನವೊಂದರಲ್ಲಿ ಗೆಳತಿಯೊಬ್ಬಳ ಬ್ಯಾಗ್ ಕದ್ದು, ಅಡಗಿಸಿಟ್ಟಾಗ, ಆಕೆ ಎಲ್ಲಾ ರೂಮುಗಳಲ್ಲೂ ಹುಡುಕಿ ಸುಸ್ತಾಗಿದ್ದಳು. ಅಳುವುದೊಂದೇ ಬಾಕಿ ಎಂದಾಗ ಆಕೆಯ ಬ್ಯಾಗನ್ನು ಹಿಂದಿರುಗಿಸಿದ್ದೆ. ಹೀಗೆ ದಿನಕ್ಕೊಂದು ಚೇಷ್ಟೆಯಿರುತ್ತಿತ್ತು!!
ನಮ್ಮೆಲ್ಲರೊಡನೆ ಗೆಳತಿಯಾಗಿದ್ದವರು ನಮ್ಮ ವಾರ್ಡನ್. ಇಂದಿಗೂ ನಾವು ಹೋದಾಕ್ಷಣ ತಮ್ಮ ಮನೆಗೇ ಹೆಣ್ಣುಮಕ್ಕಳು ಬಂದರೆಂದು ಸಂಭ್ರಮಿಸಿ, ಊಟಹಾಕುತ್ತಾರೆಂದರೆ ಅದು ಅವರ ಹಿರಿಮೆ.
ಐದು ವರ್ಷಗಳ ನೆನಪಿನ ಮೂಟೆಯೊಂದಿಗೆ ಹಾಸ್ಟೆಲ್ ಬಿಟ್ಟು ಹೊರಟ ದಿನ ಮನದಲ್ಲೊಂದು ಶೂನ್ಯಭಾವ, ವಾರ್ಡನ್ ಅವರ ಕಣ್ಣಂಚಲ್ಲಿ ನೀರು..!
ಇಂದು 'ಶಾಲ್ಮಲಾ ಹಾಸ್ಟೆಲ್' ಎಂದಾಕ್ಷಣ ಅಲ್ಲಿನ ಗೆಳತಿಯರು,ವಾರ್ಡನ್, ಹಾಗೆಯೇ ಹಾಸ್ಟೆಲ್ ಮಕ್ಕಳು ಸಮಸ್ಯೆ ಎಂದಾಗ ತಕ್ಷಣ ಸ್ಪಂದಿಸುವ ನಮ್ಮ ಪ್ರಿನ್ಸಿಪಾಲರು ಮನದಲ್ಲಿ ಹೀಗೊಮ್ಮೆ ಹಾದುಹೋಗುತ್ತಾರೆ.
ಈ ದಿನ ಎಲ್ಲರೂ ಹೇಳುವ ಮಾತು ಒಂದೇ.. ಆ ದಿನಗಳು ಮತ್ತೆ ಬರಲಾರವು.. ಅಂತಹ ಗೆಳೆತನ ಮತ್ತೆ ಸಿಗಲಾರದು.. ಆ ಚೇಷ್ಟೆಗಳನ್ನು ಮತ್ತೆ ಮಾಡಲಾಗದು.. ಜೀವನದ ಅತ್ತ್ಯುತ್ತಮ ದಿನಗಳನ್ನು ಪಟ್ಟಿ ಮಾಡಿದಲ್ಲಿ, ಮೊದಲು ನೆನಪಾಗುವುದೇ ಹಾಸ್ಟೆಲ್ ದಿನಗಳು.........
No comments:
Post a Comment