ಮಲ್ಲಿಗೆ

ಜೀವವೇ.. ಕೇಳು ನೀ 

ಪುಟ್ಟದೊಂದು ಆಸೆ ಎನಗೆ 

ಮನೆಯಂಗಳದ ತುದಿಯಲಿ 

ಬೆಳೆದು ನಿಂತ ಅಚ್ಚಹಸಿರ ಗಿಡದಲಿ

ಅರಳಿ ನಿಂತಿವೆ ಮಲ್ಲಿಗೆ..

ಚಳಿಗಾಲದ ಇರುಳಿನಲಿ ಹೊಳೆವ ತಾರೆಗಳಂತೆ!

ಮೃದು ಮಲ್ಲಿಗೆಯ ಸೌಗಂಧಕೆ ಮಾಗಿ ಬಾಗಿ ವಯ್ಯಾರದಲಿ ಬಳುಕುತಿದೆ ಸೊಕ್ಕಿ ನಿಂತ ಗಿಡ

ನಿನ್ನೊಲವಿಗೆ ಸೋತು ಬಳುಕುವಂತೆ!

ಸೋತರೂ ಗೆದ್ದುನಿಂತು ಸೊಕ್ಕುವಂತೆ!!

ವಿಕಸಿತ ಕುಸುಮಕೆ ಅದಾವ ಅಪೇಕ್ಷೆಯೂ ಕಾಣುತಿಲ್ಲ;

ತನ್ನ ಜಗಕೆ ಘಮವ ಪಸರಿಸಿ ತನ್ನಸ್ತಿತ್ವವ ಸ್ಥಾಪಿಸಿ

ಸಂತಸವ ಮೆಲ್ಲಗೆ ಹಂಚುವ ಮಲ್ಲಿಗೆಯಂತೆ 

ನಾನಾಗಬೇಕು ನಿನ್ನ ಬಾಳಿಗೆ..