ನೀಲಿ ಸೀರೆ, ಝರಿ ಸರಿ ಬರಲಿಲ್ಲ,
ಕೆಂಪು ಸೀರೆಗೆ ಅಂಚು ದಪ್ಪ,
ಹಸಿರು ಸೀರೆಗೆ ಚಿತ್ತಾರವೇ ಇಲ್ಲ...
ಗೆಳೆಯಾ, ನೆರಿಗೆ ಸರಿಪಡಿಸಲು
ನೀ ಜೊತೆಗಿರದಿದ್ದರೆ ಎಲ್ಲವೂ ಬಣ್ಣ ಮಾಸಿದಂತೆ....
ಹೂವು ಬೇಕೆಂದು ಹೋದೆ
ಗುಲಾಬಿ ದಳಗಳೆಲ್ಲ ಉದುರಿತ್ತು,
ಸೇವಂತಿ ಮುದುಡಿ ಹೋಗಿತ್ತು,
ಮಲ್ಲಿಗೆ ಅರಳಲೇ ಇಲ್ಲ...
ಗೆಳೆಯಾ, ಹೂ ಮುಡಿಸಲು
ನೀ ಜೊತೆಗಿರದಿದ್ದರೆ ಎಲ್ಲೂ ಸುಗಂಧವೇ ಇರದಂತೆ....
ಒಡವೆ ಬೇಕೆಂದು ಹೋದೆ
ಬಳೆಗೆ ಕಳೆಯೇ ಇಲ್ಲ,
ಕಿವಿಯೋಲೆ ಹೊಂದಲಿಲ್ಲ,
ಗೆಜ್ಜೆಗೆ ದನಿಯೇ ಇಲ್ಲ...
ಗೆಳೆಯಾ, ಒಡವೆ ತೊಡಿಸಲು
ನೀ ಜೊತೆಗಿರದಿದ್ದರೆ ಎಲ್ಲವೂ ಹೊಳಪ ಕಳೆದುಕೊಂಡಂತೆ.....
ಯಾವುದೂ ಬೇಡೆಂದು ಸುಮ್ಮನೆ ಕುಳಿತೆ
ನೋಡು, ನನ್ನೊಳಗೂ-ಹೊರಗೂ ನೀನೇ ಇರುವೆ
ನೆನಪಿನ ಹೊತ್ತಿಗೆ ಎದುರೇ ಹರಡಿದೆ,
ನೀ ಕೊಟ್ಟ ನವಿಲುಗರಿಯೂ ಮಾಸುತಿದೆ
ಗೆಳೆಯಾ, ಕಚಗುಳಿ ಇಡಲು
ನೀ ಜೊತೆಗಿರದಿದ್ದರೆ ಚಂದದ ನೆನಪೂ ಸುಡುವ ಅಗ್ನಿಯಂತೆ....
-ಪಲ್ಲವಿ
ಚೆಂದದ ನೆನಪೂ ಸುಡುವ ಅಗ್ನಿಯಂತೆ. ..
ReplyDeleteವಾಹ್ ,..