ಹುಟ್ಟಿದಳು ಅವಳು
ನನ್ನ ಮುದ್ದು ಮಗಳು
ಅವಳೊಡನೆ ಹುಟ್ಟಿದಳು ಅಮ್ಮ
ಅದೇ ಮಗಳ ಅಮ್ಮ...
ಅವಳು ನನ್ನ ಕೀರುತಿ
ಒಮ್ಮೊಮ್ಮೆ ನನ್ನ ಗೆಳತಿ
ನನ್ನ ಬಾಳಿನ ಜ್ಯೋತಿ
ಮನೆ- ಮನದ ಶಾಂತಿ...
ಅವಳಿಗೂ ಆಯ್ತು ಲಗ್ನ
ಸಂಸಾರದಲಿ ಅವಳು ಮಗ್ನ !!
ಅವಳೀಗ ಅವನ ಹೆಂಡತಿ
ಕೊಡುವಳು ಬೊಗಸೆ ತುಂಬ ಪ್ರೀತಿ...
ಅವಳು ಈಗ ಅಮ್ಮ
ನನ್ನ ಪ್ರೀತಿಯ ಅಮ್ಮ
ನನ್ನ ದಾರಿದೀಪ ಅವಳು
ಎಂದಿಗೂ ಪ್ರಾಣ ಸ್ನೇಹಿತೆ ಅವಳು...
ನೋವಿರಲಿ- ನಲಿವಿರಲಿ
ನೆನಪಾಗುವುದು 'ಅಮ್ಮಾ' ಎಂದೇ..
ಅವಳುತ್ತರ ನಗುಮೊಗದಿಂದಲಿ -
" ಓ...ಬಂದೇ...."
ಅವಳೀಗ ಅಜ್ಜಿ
ನನ್ನ ಮುದ್ದು ಅಜ್ಜಿ
ಕತೆಯ ಹೇಳುತಾ ಮಲಗಿಸುವಳು
ತಾನೇ ಒಂದು ಕತೆಯಾಗುವಳು...!
ಅವಳೇ ಮುದ್ದು ಮಗಳು
ಅವಳೇ ಪ್ರಾಣ ಗೆಳತಿ
ಅವಳೇ ಪ್ರೀತಿಯ ಹೆಂಡತಿ
ಅವಳೇ ಜೀವದ ಜೀವ -ಅಮ್ಮ
ಅವಳೇ ಕತೆ ಹೇಳುವ ಅಜ್ಜಿ
ಅವಳೇ ಸಹನೆಯ ಮೂರುತಿ
ಅವಳೇ ಮನೆಯ ನಗು
ಅವಳೇ ಬಾಳಿನ ಬೆಳಕು
ಬದುಕಿನ ಪಥ ಮುಗಿದರೂ-
ಅವಳೆಂದಿಗೂ ಅವಳಲ್ಲ
ಆದರೂ ಅವಳಿಗೆ ಸಾಟಿಯಿಲ್ಲ
"ಅವಳು ಅವಳೇ".................
No comments:
Post a Comment