ಧೀರ

ಕತ್ತಲಾಗಸದಿ ಅತ್ತ ನೋಡಿದರೆ 

ಚಿತ್ತ ಹರಿವುದು ನಿನ್ನ ಸುತ್ತ

ಎತ್ತ ತಿರುಗಲಿ ಇನ್ನೆಂತು ಕಾಣಲಿ

ತೋರುಬೆರಳ ತುತ್ತ ತುದಿಯ ಭರವಸೆಯಲಿ...

ಧಗಧಗನೆ ಸುಡುತಿಹ ಉರಿ ಬಿಸಿಲಲಿ

ನಿನ್ನ ಪಾದ ಧೂಳಿಯಿರದೆ

ದಾರಿಗೆ ಮಂಕು ಕವಿದಿಹುದು;

ಧೀರನಿವ ಬರುವನೆಂದು ಮನ ಕಾಯುತಿಹುದು...

ಇಂದು ಯುದ್ಧವಂತೆ,

ನೀನು ಮುನ್ನುಗ್ಗುವ ಯೋಧನಂತೆ

ಮನದಲ್ಲೊಂದು ಅಳುಕೆನಗೆ

ಮಸಣ ಮೌನ ಮನೆಯೊಳಗೆ...

ನಿನ್ನ ಮತ್ತೆ ಕಾಣುವ ಭಾಗ್ಯವಿರದಿದ್ದರೆ

ಈ ಕಣ್ಣುಗಳು ಬರಡಾಗುವ ಅಂಜಿಕೆಯೆನಗೆ...

ಗಡಿ ಕಾಯುವ ಧೀರ ನೀನು;

ನಿನ್ನ ಕಾಯುತಿಹ ಧೀರಳು ನಾನು

ಯುದ್ಧದ ಜೈಕಾರ ದೇಶದೆಲ್ಲೆಡೆ ಮೊಳಗುತಿದೆ

ನನ್ನೊಳಗಿನ ಹೋರಾಟ ಯಾರಿಗೂ ಕಾಣದೇ..?

(ನನ್ನ ನಾಲ್ಕಕ್ಷರಗಳ ಮೂಲಕ ದೇಶ ಕಾಯುತ್ತ ಗಡಿಯಲ್ಲಿರುವವಗೆ ನಮಿಸುವೆ. ಅವನ ಕಾಯುತ್ತಿರುವ ಜೀವಕ್ಕೆ ಅರ್ಪಿಸುವೆ.)