ಯಾವುದೀ ಹಾದಿಯು...

ಯಾವುದೀ ಹಾದಿಯು.. 

ಓಡುವ ಚಂದಿರನತ್ತ ಸಾಗುತಿಹುದು.. 

ನಭಕೆ ನಕ್ಷೆಯ ಹಾಕಿ, 

ಚುಕ್ಕಿಯ ಕೈಲಿ ಹಿಡಿದು, 

ಶಶಿಯೊಡನೆ ಹರಟುವ ಕನಸು ಹೊತ್ತವಳಿಗೆ.. 

ಈ ಹಾದಿ ಕಾಣಲೇ ಇಲ್ಲ..!

ಜಗದ ಧ್ವನಿಯ ತೊರೆದು, 

ಜಂಜಡಗಳಿಂದ ದೂರ ಉಳಿದು, 

ತನ್ನದೇ ಲೋಕದಲ್ಲಿ ತೇಲುತಿರುವವಳಿಗೆ.. 

ಚುಕ್ಕಿ ಚಂದ್ರಮನೇ ಗೆಳೆಯರಲ್ಲ.. 

ಮೋಹದ ಶಶಿ, 

ಲೋಕಕೆ ತಂಪೆರೆದು;ಅವಳ ಬಿಸಿ ಹೆಚ್ಚಿಸಿ, 

ಮಾಯವಾಗುವಾಗ ಅವಳ ದುಗುಡಗಳಿಗೆ.. 

ಮಿತಿ ಎಂಬುದೇ ಇಲ್ಲ.. 

ಮತ್ತದೇ ತಳಮಳ, ಕಾತುರ, 

ಕಾಣದ ಹಾದಿಯಲಿ, ಮಬ್ಬು ತಿಂಗಳ ಬೆಳಕಲಿ, 

ಮೋಡಗಳ ಹಿಂದೆ ಮರೆಯಾದ ಚಂದಿರಗೆ.. 

ಅವಳಂತರಾಳ ಅರಿವಾಗಲೇ ಇಲ್ಲ..  

ಕಾಯುತಿಹಳು ಅವಳು, 

ಬಾಗಿಲ ಮರೆಯಲಿ ನಿಂತು.. 

ಹೇಳಬಲ್ಲಿರಾ? ಯಾವುದೀ ಹಾದಿಯು.. 

ಓಡುವ ಚಂದಿರನತ್ತ ಸಾಗುತಿಹುದು..