ವ್ಯಾನಿಟಿ ಬ್ಯಾಗು..

( ವ್ಯಾನಿಟಿ ಬ್ಯಾಗ್, ಪರ್ಸ್ ಗಳ ಮೇಲೆ ಬಹಳ ಹುಚ್ಚು !! ಆ ಸಂಗ್ರಹ ನೋಡಿದರೆ ಈಗ ನನಗೇ ಆಶ್ಚರ್ಯ ! ಒಂದು ಲಗೇಜ್ ಬ್ಯಾಗ್ ಬೇಕಾಗಬಹುದೇನೋ.. ಈ ಪರ್ಸ್, ಬ್ಯಾಗ್ ಗಳನ್ನು ತುಂಬಲು....ಈ ಸಾಲುಗಳು ಆ ವ್ಯಾನಿಟಿ ಬ್ಯಾಗುಗಳಿಗೇ ಅರ್ಪಣೆ !! )

ಹೆಣ್ಣಿನ ಮನ ಗೆಲ್ಲಲು ಗಂಡು ಸೋಲಬಹುದು.. 

ವ್ಯಾನಿಟಿ ಬ್ಯಾಗಲ್ಲ.. 

ಅಂಗಡಿ ಅರಮನೆಯ ಹೊಕ್ಕರೆ ಸಾಕು.. 

ನನ್ನದೇ ಸ್ವಯಂವರವೆಂಬ ಭಾವ.. 

ಸುರಸುಂದರ, ಮನಮೋಹನ, ಅಸ್ಥಿ ಪಂಜರ, 

ದೈತ್ಯದೇಹಿ, ಸಿಕ್ಸ್ ಪ್ಯಾಕ್ ಶೂರ...

ಎಣ್ಣೆ ಹಚ್ಚಿ ಕ್ರಾಪ್ ತೆಗೆದು ಬಾಚಿದ ಫಸ್ಟ್ ಬೆಂಚ್ನವ.. 

ಎಷ್ಟು ಎಂದು ನೋಡಲಿ ನಾನೂ.. 

ಅಷ್ಟು ವೆರೈಟಿ ವ್ಯಾನಿಟಿ ಬ್ಯಾಗುಗಳು.. 

ಚೌಕ, ಅರ್ಧ ಚಂದ್ರ, ಶಂಕು, ದೋಣಿಯಾಕಾರ...

ಕಪ್ಪು, ಬಿಳಿ, ಕೆಂಪು, ನೀಲಿ.. ಝರಿ,ಚುಕ್ಕೆ,ಪಟ್ಟೆ..

ಅಬ್ಬಬ್ಬಾ.. ಯಾವುದ ಆರಿಸಲಿ.. 

ಎಲ್ಲವೂ ಮನ ಗೆದ್ದವೇ... 

ಅಂಗೈಲಿ ಹಿಡಿವುದೇ, ಹೆಗಲಿಗೆ ನೇತಾಡಿಸುವುದೇ.. 

ಮೊಣಕಾಲವರೆಗೆ ಜೋತಾಡುವುದೇ.. ಕಂಕುಳಲಿ  ಅಂಟುವುದೇ?.. 

ಸಣ್ಣ ದಾರವೇ, ದಪ್ಪದ್ದೇ?  ಜಿಪ್ ಇರಲೊ, ಬಟನ್ ಇರಲೊ?.. 

ನಾಯಿಯ ಚೈನ್ ಇರುವ ಬ್ಯಾಗ್ ಇರಲೋ?.. 

ಮೊಬೈಲ್ ಹಾಕುವಷ್ಟು ಸಣ್ಣದೂ ಸಾಕು, 

ಬಟ್ಟೆ ಹಿಡಿಯುವಷ್ಟು ದೊಡ್ಡದೂ ಬೇಕು.. 

ಅಮ್ಮನ ವ್ಯಾನಿಟಿ ಬ್ಯಾಗ್ ನೋಡಿ, ನನಗೊಂದು 

ಬೇಕೆಂದು ಜಾತ್ರೆಯಲಿ ರಚ್ಚೆ ಹಿಡಿದು,

ಅಪ್ಪನ ಕಾಸಿಗೆ ಕತ್ತರಿ ಹಾಕಿ, ನನ್ನ ಕಾಸು ತುಂಬಲು ತೆಗೆದುಕೊಂಡ ಪುಟ್ಟ ಹೂವಿನ ವ್ಯಾನಿಟಿ ಬ್ಯಾಗ್..

ನನ್ನ ಲವ್ ಎಟ್ ಫಸ್ಟ್ ಸೈಟು... 

ಏನಿದೆ ಏನಿಲ್ಲ..?? ಅದೊಂದು ಪುಟ್ಟ ಪ್ರಪಂಚ !

ಹೂವು-ಹೂವಿನ ಕರ್ಚಿಪು, ಹಣೆ ಬೊಟ್ಟು, ಬಾಚಣಿಗೆ  

ಕ್ಲಿಪ್ಪು, ಕಾಡಿಗೆ, ತುಟಿಯ ಕೆಂಪು, ಪೌಡರ್ ಡಬ್ಬಿ... 

ಜೊತೆಯಲ್ಲೊಂದು ಪೆನ್ನು, ಪೇಪರು, 

ನಾಲ್ಕು ವಾರ ಹಿಂದಿನ, ಮುದ್ದೆಯಾದ ಬಸ್ ಚೀಟಿ ! ಹರಿದ ಸರದ ಮಣಿಗಳು !

ಕಂಡೂ ಕಾಣದಂತೆ ಅಡಗಿ ಕುಳಿತ

 ಎಮರ್ಜೆನ್ಸಿ ಪ್ಯಾಡ್ !!

ಈಗೀಗ ಮೊಬೈಲು, ಅದರೊಡನೆ ಕಿವಿಗೆ ಹಾಕುವ ದಾರ.. ಬ್ಯಾಗಿನೊಳಗೊಂದು ಪರ್ಸು.. 

ಕೆಲವೊಮ್ಮೆ ತಿಂಡಿ ಡಬ್ಬಿಯೂ, ನೀರು ಬಾಟಲಿಯೂ ತೂರಿಕೊಂಡು ಕುಳಿತುಬಿಡುತ್ತವೆ... 

ಹೆಣ್ಮಕ್ಳ ವ್ಯಾನಿಟಿ ಬ್ಯಾಗ್ನಲ್ಲಿ ಏನಿದೆ 

ಎಂದು ಕದ್ದು ನೋಡಿದವನೊಬ್ಬ.. 

ಕೃಷ್ಣನ ಬಾಯಲ್ಲಿ ಬ್ರಹ್ಮಾಂಡ ಕಂಡ ಯಶೋದೆಯಂತೆ 

ದಿಗ್ಭ್ರಾಂತನಾದನಂತೆ !!

-ಪಲ್ಲವಿ