ಧೂಳೊರೆಸಿದಂತೆ...

ಧೂಳೊರೆಸಿದಂತೆ ನೆನಪುಗಳನ್ನೂ ಒರೆಸುವ 

ಶಕ್ತಿ ಇದ್ದರೆ ಎಷ್ಟು ಚೆನ್ನ..!!

ಡೈರಿ ಎದುರಲ್ಲೇ ಇತ್ತು..

ಕೈಲಿ ಹಿಡಿದೆ ನೋಡು, ಕೈತುಂಬಾ ಕೆಂಪು.. 

ಗೋರಂಟಿಯಲ್ಲ ಇದು ಧೂಳು ಎಂದರಿವಾಗಲು ಸ್ವಲ್ಪ ಸಮಯ ಬೇಕಿತ್ತು.. 

ಒಳ ಪುಟಗಳನ್ನು ತೆರೆದಂತೆಲ್ಲಾ 

ಕಾಡತೊಡಗಿತು ನೋಡು, ನಿನ್ನದೇ ನೆನಪು.. 

ಅಲ್ಲಲ್ಲಿ ಮಾಸಿದ ಅಕ್ಷರಗಳು ಮತ್ತೆ ಮತ್ತೆ ಅದೇನು ಎಂದು ನೆನಪಿಸಲು ಪ್ರಯತ್ನಿಸಿವೆ.. 

ನಕ್ಕಿದ್ದೆಯಲ್ಲ, ನವಿಲುಗರಿ ಮರಿ ಹಾಕುತ್ತಾ ಎಂದು.. 

ಅಣಕಿಸಿದೆ ನೋಡು, ಅದೇ ನವಿಲುಗರಿ.. 

ಪುಟಗಳ ನಡುವೆ ಬಚ್ಚಿಟ್ಟುಕೊಂಡು ನಿನ್ನ ನೋಡಿ ನಕ್ಕವ ಎಲ್ಲಿ ಹೋದನೆ ? ಎನ್ನುತ್ತಾ!!

ಗುಲಾಬಿ ದಳಗಳು ಸೊರಗಿ  ಒಣಗಿವೆ.. 

ಪತಂಗ ಮುಟ್ಟಿದಾಕ್ಷಣ ತನ್ನ ಬಣ್ಣ ನಮ್ಮ 

ಕೈಗಿಡುತ್ತದೆ ನೋಡು, ಹಾಗೆಯೇ ಗುಲಾಬಿ ಕಳೆಗುಂದಿದೆ; ನಗುವಿರದ ಮೊಗದಂತೆ.. 

ಕೊನೆಯ ಪುಟ ಬಹಳ ಕಾಡಿದೆ.. 

ನಿನ್ನ ಹಸ್ತಾಕ್ಷರ ನೋಡು.. ಅದೆಷ್ಟು ಪ್ರೀತಿ ತುಂಬಿದೆ.. 

ಕೊನೆಯ ಪುಟವೇ ಕೊನೆಯ ಭೇಟಿಯ ನೆನಪು ನೋಡು.. 

ಪ್ರತಿ ಬಾರಿಯೂ ಕೊನೆ ಪುಟ, ಕಣ್ಣ ಹನಿಗಳಿಂದ ಒದ್ದೆಯಾಗಿದೆ;

ಹಸ್ತಾಕ್ಷರವ ಇನ್ನೊಮ್ಮೆ ನೀಡಲು ಬರುವೆ ಎಂಬ ಹುಸಿ ನಂಬಿಕೆಯೊಂದು ಜೀವಂತವಾಗಿದೆ.. 

ಧೂಳೊರೆಸಿದಂತೆ ನೆನಪುಗಳನ್ನೂ ಒರೆಸುವ 

ಶಕ್ತಿ ಇದ್ದರೆ ಎಷ್ಟು ಚೆನ್ನ..!!

-ಪಲ್ಲವಿ