ಗೋಡೆಯ ಮೇಲಿನ ಬಿರುಕು...

ಗೋಡೆಯ ಮೇಲಿನ ಬಿರುಕು 

ಎಂದೂ ನನ್ನ ಖುಷಿ ಪಡಿಸಲೇ ಇಲ್ಲಾ.. 

ನನ್ನ ಮುಪ್ಪನ್ನು, ಮುಖದ ಮೇಲಿನ ಸುಕ್ಕನ್ನು 

ಅಣಕಿಸಿದೆಯೇನೋ ಎನಿಸಿತ್ತು.. 

ಚರ್ಮದ ನೆರಿಗೆ ಹೆಚ್ಚಿದಂತೆಲ್ಲಾ 

ಬಿರುಕು ಉದ್ದವಾದಂತೆ ಕಂಡಿತ್ತು.. 

ನನಗೂ ಈ ಬಿರುಕಿಗೂ ಅದೆಂಥ ಸಾಮ್ಯತೆ? 

ಗೋಡೆಯೇ ಉತ್ತರಿಸಬೇಕು.. 

ಮೋಡವಾದೊಡನೆ ಒಳಸೇರುವ ನಾನೆಲ್ಲಿ? 

ಮಳೆಯ ಹಂಬಲಿಸಿ ಊರ್ಧ್ವಮುಖಿಯಾದ ಬಿರುಕು ಎಲ್ಲಿ? 

ಮುಪ್ಪಡರಿದ ದೇಹವ ಶಪಿಸುವ ನಾನೆಲ್ಲಿ.. 

ಬಿರುಕು ಕೂಡಾ ಚಿತ್ತಾರವೇ ಎಂದು ಪ್ರೀತಿಸುವ ಗೋಡೆಯೆಲ್ಲಿ.. 

ಗೋಡೆಯ ಮೇಲಿನ ಬಿರುಕು 

ಇಂದು ಬಹಳ ಪ್ರಿಯವಾಯಿತಲ್ಲ....