ನಿನಗೆ ಹುಚ್ಚೆನಿಸಬಹುದು...

ನಿನಗೆ ಹುಚ್ಚೆನಿಸಬಹುದು.. 

ಈ ಬಳೆಗಳೆಲ್ಲ ಮಾತನಾಡುತ್ತವೆ ನನ್ನ ಬಳಿ.. 

ಎಷ್ಟೆಂದರೂ ನೀನೇ ತೊಡಿಸಿದ್ದಲ್ಲವೇ.. 

ಮುಂಗುರುಳ ಕಿವಿಯ ಹಿಂದೆ ತಳ್ಳುವಾಗಲೆಲ್ಲ ಪಿಸುದನಿಯಲ್ಲಿ ನಿನ್ನ ಹೆಸರ ಹೇಳಿದಂತೆ ಅನುಭೂತಿ.. 

ನಿನ್ನ ಬಿಸಿಯುಸಿರಲ್ಲಿ ಪಿಸುದನಿಯ ಬೆರೆಸಿ ಬಳೆಯೊಡನೆ ಆಡಲು ಒಮ್ಮೆ ಬಾ ಇನಿಯಾ.. 

ನಿನಗೆ ಹುಚ್ಚೆನಿಸಬಹುದು.. 

ಈ ಗೆಜ್ಜೆ ಘಲ್ ಎಂದಾಗೆಲ್ಲ ನನ್ನೆದೆ ಝಲ್ ಎನ್ನುತ್ತದೆ.. 

ಎಷ್ಟೆಂದರೂ ನೀನೆ ಕಟ್ಟಿದ್ದು.. 

ಕಾಲ ಕೊರಳ ಸುತ್ತ ಬಿಗಿಯಾಗಿ ಅಪ್ಪಿಕೊಂಡು, ಹೆಜ್ಜೆ ಹೆಜ್ಜೆಗೂ ನನ್ನ ಸ್ಪರ್ಶಿಸಿ, ಮುದ್ದಿಸಿ, ಕಾಡುವ ಗೆಜ್ಜೆಯ ದನಿಯ ಕೇಳಲು ಒಮ್ಮೆ ಬಾ ಇನಿಯಾ.. 

ನಿನಗೆ ಹುಚ್ಚೆನಿಸಬಹುದು.. 

ನವಿಲುಗರಿ ಸವರಿದಾಗಲೆಲ್ಲ ಎದೆಬಡಿತ ಜೋರು.. 

ಎಷ್ಟೆಂದರೂ ನೀನೇ ಕೊಟ್ಟಿದ್ದು.. 

ಕಿರುಬೆರಳ ತುದಿಯ ಸವರಿದರೂ ಸಾಕು, ನೀನೆ ಸುಳಿದಂತೆ, ಗಾಳಿಯಲ್ಲಿಯೂ ನಿನ್ನ ಬೆವರ ಘಮ ಸೋಕಿದ ರೋಮಾಂಚನ.. 

ನವಿಲುಗರಿಯಂತೆ ನವಿರಾಗಿ ಸ್ಪರ್ಶಿಸಲು ಒಮ್ಮೆ ಬಾ ಇನಿಯಾ.. 

ನಿನಗೆ ಹುಚ್ಚೆನಿಸಬಹುದು.. 

ಒಂದೊಂದು ಮಳೆಯ ಹನಿ ತಾಕಿದಾಗಲೂ ಕಂಪನ.. 

ಎಷ್ಟೆಂದರೂ ಮಳೆಯೇ ನಮ್ಮಿಬ್ಬರ ಬೆಸುಗೆ.. 

ಪಾದದ ಮೇಲೆ ಬಿದ್ದು ಕಚಗುಳಿಯಿಟ್ಟು, ಪುಳಕಿತಕೊಂಡು, ಕೇಶವ ನೆನೆಸಿ, ಮುಖ ಮೇಲೆತ್ತಿ ಕಣ್ಮುಚ್ಚಿ ನಿಂತರೆ ಒಳಗೂ ಮಳೆಯೇ.. 

ಮುಚ್ಚಿದ ಕಣ್ಣ ಒಳಗಿನ ಬೆಳಕನು ಕಾಣಲು ಒಮ್ಮೆ ಬಾ ಇನಿಯಾ.. 

-ಪಲ್ಲವಿ 

(ಚಿತ್ರಕ್ಕಾಗಿ ಸಾಲುಗಳು)